12 July 2015
10:37 - АҚШга ИШИДнинг келиши яқинлашмоқда, Абдураҳим Пўлатнинг таклифларини қабул қилишдан бошқа йўл йўқ
АҚШнинг энг обрўли газеталаридан бири US Today жума кунги сонида билдиришича, сўнгги бир ой ичида 10 дан ортиқ киши ИШИД билан алоқаси бор деган шубҳа остида ҳибсга олинган. Федерал Тергов Бюроси (ФТБ, инглизчаси - Federal Bureau of Investigation – FBI) раиси Жеймс Комей бу кишилар 4 июлда нишонланадиган Мустақиллик Куни бир қатор америкаликларни ўлдиришга тайёрланишаётганнини айтган. Улар қандай йўллар билан америкаликларни ўлдиришмоқчи бўлишгани ҳақидаги саволларга Жеймс Комей жавоб беришдан бош тортибди.

У ҳибсга олинганлар ҳақида ҳам ҳеч қандай маълумот бермаса-да, Нью-Йоркда қўлга олинган 21 ёшли Фарид Муминий ФТБ агентини ўлдирмоқчиликда айбланаётганини айтибди. Тахмин қилиш мумкинки, Фарид Муминий ўзини кузатаётган ФТБ агентини сезиб қолган ва ундан қутилмоқчи бўлган.

Жеймс Комей ўзи раҳбарлик қиладиган Федерал Тергов Бюроси ва Ватан Хавфсизлик Вазирлиги биргаликда байрамдан аввал ИШИД билан алоқадор одамларни фош қилишгани ва байрам арафасида ҳаммани эҳтиёт бўлишга чақирувчи баёнот эълон қилишганини айтган, ИШИДнинг хавфи ҳали давом этишини урғулаган. Эслатиб ўтиш керакки, АҚШнинг оммавий ахборот воситалари, биринчи навбатда, телеканалларда ҳаммани эҳтиёт бўлишга чақирувчи баёнотлар эълон қилишаётганини “Ҳаракат” Агентлиги айнан 4 июлда билдирган эди.

US Today газетасидаги мақолада террор сўзи ишлатилмаса ҳам, аслида, Федерал Тергов Бюроси ИШИД билан боғлиқ одамлар АҚШда терористик актлар қилишга тайёрланаётганларини тан олмоқда, дейди мухбиримиз. Яна ҳам очиқроқ айтсак, ИШИД ва исломий терроризмнинг Америкага етиб келишига тайёрланмода.

Шу сабабли, “Ҳаракат”нинг сайтида аввалдан ҳам кўп марта айтилаётган фикрни қайтаришдан фойда бор.

Гап шундаки, ислом терроризми хавфидан фақат куч ишлатиш йўллари билан қутилиб бўлмайди. Исломда фундаментал ислоҳотлар ўтказилиб, Ислом дини дунёвийлик/секуляризм принципини қабул қилмагунча, терроризмнинг илдизлари қуримайди. Бутун дунёда ҳам, АҚШда ҳам.

“Бирлик” Партияси лидери Абдураҳим Пўлатнинг бу ҳақдаги таклифлари АҚШ тарафидан эртами кеч қабул қилинади, чунки, бошқа йўл йўқ.