115 кишилик уйғурлар гуруҳи Хитойда таҳлика остида қолганлари сабабли 16 ой аввал Таиландга қочиб келиб, у ердан Туркияга кетмоқчи бўлганлари, аммо Таиланд ҳукумати уларни Хитойга қайтариб бермоқчи эканлигини аввалроқ хабар қилгандик. Туркияда турклар Таиланднинг Анқарадаги элчихонаси ва Истанбулдаги фахрий консуллиги олдидаги норозилик намойишлари ўтказганлари, хитойлик деб ўйлаб кореялик туристларга ҳужум қилганлари ҳам айтилган эди.

Ҳозир маълум бўлишича, Таиланд ҳукумати уйғурларни Хитойга топшириб бўлган. Уйғурларни бошига халта кийғазиб учоқдан туширишаётгани пайтида олинган расмлар Туркия газеталарида пайдо бўлди. Расмлар Дунё Уйғурлар Конгресси раисининг ўринбосари, Туркиядаги Шарқий Туркистон Жамиятининг раиси Сайит Тумтуркдан олингани ҳам хабарларда айтилган. Кўринишидан, у расмни Хитойнинг инглиз тилида ҳам эшиттиришлар берувчи CCTV-13 телеканалидан олган.

Тахмин қилиш қийин эмаски, Туркиядаги норозилик намойишлар ҳам у мамлакатда кучли диаспорага эга бўлган уйғурларнинг ташаббуси билан ўтказилган. Буни тушунса бўлади, чунки, улар ўз миллатдошларининг тақдирига бефарқ қололмасдилар, қолмадилар ҳам.

Бу хабар туфайли жаҳон ўзбекларининг аҳволига яна бир назар ташлашдан ўзимизни тия олмадик, дейди мухбиримиз. 2010 йилнинг 10-12 июнь кунлари қирғиз фашистлари ўзбекларни тириклайин ёқдилар, ўзбекнинг қиз-аёлларини подалашиб зўрладилар, 3 кунда 300 ўзбекни ўзбек бўлгани учун ваҳшийларча ўлдирдилар. Жаҳон бўйича сони 30 миллиондан ортган ўзбеклар ҳамма жойда, Ўзбекистонда, Туркияда, АҚШда ва бошқа мамлакатларда ҳамма тешикларини қисиб ўтирдилар.

Фақат “Бирлик” Партияси миллатпарварлигини яна бир марта намойиш қилиб, Ўзбекистон ҳукуматидан Қирғизистонга ўз армиясини тинчликни сақловчи куч сифатида олиб киришни талаб қилди. Аммо, ўзбек миллатининг душманларидан иборат мавжуд режим ҳеч нарса қилмаган бўлса ҳам, “Бирлик”нинг шу баёнотиёқ қирғизларнинг эс-ҳушини жойига келтирди, қирғин тўхтатилди.

2001 йил 10 июнь куни “Бирлик” ва “Эзгулик” Қирғизистоннинг Тошкентдаги элчихонаси олдида норозилик намойиши ўтказдилар. Аммо, шу акцияга ҳам ўзбек миллати эътибор бергани йўқ.

Ҳозир эса, Қирғизистон ҳукуматининг ўзи геноцид сиёсатини давом эттириб, ўзбекларни тарихий ерларидан сиқиб чиқариш билан шуғулланмоқда. Қирғизистон парламенти Мустақил Халқаро Комиссиянинг ҳисоботини тан олишдан ҳам бош тортди, яқинда қандайдир халқаро конференцияда қатнашиш учун Бишкекка келган Ўзбекистон инсон ҳуқуқлари “Эзгулик” жамиянинг раиси Васила Иноят Қирғизистонга киритилмасдан депортация қилинди.

Ахир бир кун ўзбек халқи шоиримиз Юсуф Жуманинг

Кечир, қасос муқаррардир, хешим менинг,
Бобуримдан қолиб кетган Ўшим менинг.

сўзларини тушуниб етадиган вақт келади. Аммо, ўша вақтнинг келишини тезлаштириш учун ғафлат уйқусида ётган ва миллат сифатини йўқотиб бўлган ўзбекларни Абдураҳим Пўлат таклиф қилаётган шок терапияси усуллари билан уйғотиш керак.