04 June 2015
17:38 - Нурсултон Назарбой Остонада Четэллик Инвесторлар Кенгашининг мажлисини ўтказмоқда, Ислом Карим ва ҳукуматининг бундай нарсаларга ақли ҳам етмайди
Қозоқларнинг расмий ахборот воситаси Казинформ бугун Нурслтон Назарбой Остонадаги Мустақиллик Саройида Четэллик Инвесторлар Кенгашининг навбатдаги мажлисини ўтказаётганини хабар қилди.

Давлат раҳбари мажлисда четэллик инвесторларни Қозоғистондаги инвестиция имкониятларини диққат билан ўрганишга ва агросаноат соҳасига ҳам инвестиция қилишга чақирар экан, инвесторларга берилаётган афзалликлар (льготалар) агросаноатга ҳам тегишли эканини урғулабди. Унинг айтишича, четэллик инвесторлар 10 йилгача ер учун солиқ тўлашдан, 8 йилгача мулк учун солиқ тўлашдан озод қилинадилар. Инвесторларга солиққа оид қонунчиликнинг барқарорлиги хусусида кафолат берилади. Бундан ташқари, объектлар ишга туширилгач, капитал ҳаражатларнинг 30 фоизигачаси давлат тарафидан қопланади.

Четэллик инвестерлар учун бундай имкониятлар жуда кам мамлакатларда берилади, дейди Нурсултон Назарбой.

Бу йиғилишда нутқ сўзлаган Инновациялар ва Ривожланиш вазири (қаранг, қозоқларда шунақаси ҳам бор) Асет Исекешевнинг айтишича, General Electric, Microsoft, Intel ва дунёнинг бошқа бир қатор компаниялари “Назарбаев Университет” қошидаги Интеллектуал инновацион кластер ҳудудида ўз корпоратив марказларини очмоқчилар.

Ўзбекистоннинг на Президент, на ҳукумат идораларида бундай масалаларни тушунадиган ва улар устида ўйлайдиган одамлар йўқ. Бунинг устига Ўзбекистонда чет эллик инвесторлар фақат ҳукумат билан ишлашади ва давлат билан қўшма корхоналар тузишади. Чунки, Ўзбекистонда катта бойлар, яъни катта инвестиция қилиш қобилиятига эга бўлган компаниялар йўқ. Бўлса эди, уларнинг ўзлари четэллик инвесторлар билан катта лойиҳалар устида иш бошлашарди. Бу соҳада аҳвол ўзгармагунча, яъни Ўзбекистон режими иқтисоднинг асосий қисмини давлат қўлида тутишдек ярим-коммунистик учулдан воз кечмагунча, бизда жиддий иқтисодий ўзгаришларни ҳаёл ҳам қилиб бўлмайди.

Яна бир нарса аниқки, Ислом Карим яратган режим ўз сиёсатини ўзгартирмоқчи эмас, ўзгартиришга қодир ҳам эмас. Ўзбек халқи кечагина отдан тушган қозоқларга мадикорлик қиладиганлар подасига айланиб бораверишни истамаса, бу режимдан тезроқ қутилишни ўйлаши, биринчи навбатда, бундай масалаларни кун тартибига олиб чиқиб, бу соҳаларда иш олиб боришга қодирлигини кўрсатаётган “Бирлик” Партиясини қўллаб-қувватлаши керак. Бошқа йўл йўқ.
« Олдинги хабар Хабарлар рўйхати Кейинги хабар »