28 April 2015
22:06 - Путиннинг арман геноциди ҳақидаги сўзлари Эрдўғонга оғир ботди
Ўрисларнинг РИА Новости агентлиги маълум қилишича, Туркия президенти Ражаб Эрдўғон россиялик ҳамкасби Владимир Путиннинг арманилар геноциди ҳақидаги сўзларидан ғазабга келди ва Путиннинг ўзига Қрим воқеаларини “эслатиб”, унинг аҳамияти геноциддан кам эмаслигини тушунтиришга уринди. Путиннинг “геноцид” сўзини тилга олганлигидан норозилигини билдирган Эрдўғон: “Россия “геноцид” сўзини биринчи марта қўллаётгани йўқ. Путиннинг бундай қадамидан ранжидим. Агар Россия бундай қиладиган бўлса, келинг тарихни эслайлик. Қаршимизда Украина, Қрим, Донецк, Луганск турибди, уларга жавоб беришсин. Туркия ҳеч ҳам геноцид содир этмаган”, – деди.

Эрдўғондан илҳомланган Анқара расмийлари ҳам Россия “охирги юз йил ичида кўп бора оммавий қотилликлар қилгани, халқларни зўрлик билан кўчиргани, жамоавий жазонинг бошқа турларини қўллаганини” эслатиб, геноцид нималигини Рссиядан ўрганиш кераклигини истеҳзо билан гапириб ётишибди.

Таъкидлаш керак, Владимир Путин “Геноцидсиз дунё” кечаси иштирокчиларига йўллаган мактубида 1915 йилнинг 24 апрелини “инсоният тарихидаги энг қўрқинчли ва аянчли воқеалардан бири – арманилар геноциди билан боғлиқ қайғули сана” деб ҳисоблашини маълум қилганди.

Турклар бу масалада қанчалик принципиаллик кўрсатишини олдиндан айтиш қийин. Чунки, Эрдўғон Ғарб билан алоқаларни ёмонлаштириш йўлидан кетмоқда. Демак, Туркия ва Россия ҳамкор эмасми?