Россиянинг ахборот воситалари Владимир Путиннинг биринчи марта президент бўлиб сайланганининг 15 йиллигига бағишланган “Президент” номли ҳужжатли фильм бугун Россия-1 телеканалида намойиш қилингани ҳақида хабар тарқатмоқдалар. Путин режимининг маддоҳлари бўлган ахборот воситалари эса, бу фильмда Путиннинг буюклиги ёритлганини мадҳ қилмоқдалар.

Аслида, Путин раҳбарлигидаги Россия Қримни босиб олиб, ҳозир Донбассда қилаётган ишлари учун Ғарбнинг санкциялари остида азоб чекаётган ўлкага айланиб бўлди. Путинга ҳам, Россияга ҳам ҳозир “бечора” сифати бериш тўппа-тўғридир. “Президент” фильмининг мақсади – бундай эмаслигини кўрсатиш, Путинни улуғлаш эканлигини ахборот воситаларидаги хабарлар ҳам кўрсатиб турибди. Тўғрисини айтса, фильмни яратганлар Путинни улуғлашдан ҳам илгари кетиб, унинг “шахсига сиғиниш” кампаниясини бошлаб берганлари ҳақида гапириш мумкин.

Алкоголикка айланиб бўлган Россия Президенти Борис Ельцин 1998 йил 25 майда ҳеч ким танимайдиган, бир вақтларда КГБда полковник даражасига кўтарилган Владимир Путинни Президент идораси раҳбарининг биринчи ўрибосари қилиб тайинлади. 25 июлда эса, КГБнинг вориси Федерал Хавфсизлик Хизматига (Федеральная Служба Безопасности - ФСБ) бошлиқ қилди. 1999 йил 26 мартда унга РФ Хавфсизлик Кенгаши секретари лавозими ҳам қўшиб берилди.

Ўша йили 9 августда Россия Бош вазири вазифасини бажарувчи этиб тайинланди. Ельцин ўша куниёқ уни ўзининг вориси деб эълон қилди. 30 декбрь куни Россия ахборот воситаларида Путиннинг “Россия минг йилликлар кечувида” номли мақоласи эълон қилинди. 31 декабрда эса, Ельцин президентликни Путинга топширди. Қаранг, ҳеч ким танимайдиган КГБ полковниги Кремлга келди ва 1,5 йил ичида Президент бўлди. СССРнинг Сталин замонида ҳокимият КГБнинг қўлида эди, Путиннинг Президент бўлиши - Россияда ҳокимият ФСБ қўлига ўтиши бўлди.

Мана, Путин Россиянинг хўжайини бўлганига 15 йил бўлибди. Ўзининг 15 йиллигига ғариб аҳволда келаётган Владимир Путиннинг шахсига сиғиниш кампанияси бошланаётгани – Россиянинг ўзи ғариб ҳолга тушганининг кўрсатгичидир.