Юқорида номи келтирилган ширкат дунё мамлакатлари фуқароларининг топиш-тутиши, ойлик даромадлари хусусида 176 давлатнинг рейтингини тузибди. Мазкур рейтингдан Ўзбекистон 141-ўринни эгаллаган. Nation Master тадқиқотларига кўра, Ўзбекистон фуқаросининг бир ойлик даромади 360,72 АҚШ долларига тенг экан. Ўтган йили бу рейтингда Ўзбекистон 130-ўринни эгаллаганди, бу йил 11 поғона пастлабди.

Рейтинг рўйхатини Швейцария (6,3 минг АҚШ доллари), Люксембург (4,47 минг АҚШ доллари) ҳамда Замбия (4,33 минг АҚШ доллари) бошқармоқда. Америкаликлар бу рейтингда 13-ўринни эгаллашган.

Nation Master нинг қайси мезонлар орқали тадқиқотлар олиб борганинини билмадиг-у, оддий аҳоли қатлами доирасида топиш-тутишнинг 360 АҚШ долларига тенглиги ҳақиқатдан йироқ.

Бу ташкилотнинг сайтида айтилишича, бу маълумотлар одамларнинг ўзидан сўраш йўли билан тўпланган экан. 85 мамлакатдагина респондентларнинг, яъни сўралганларнинг сони 100 дан кўп бўлган. Бечора ўзбеклар уялганларидан бўлса керак, даромадларини 4 баравар кўп кўрсатишганга ўхшайди. Чунки, Ўзбекистонда ўртача ойлик 90 доллар атрофида эканлиги жуда кўп манбаларда кўрсатилгани ҳақида “Ҳаракат” кўп марта хабарлар берган.

Дарвоқе, "Nation Master"нинг cайтида ҳар қандай давлат иқтисодининг кучини асосий кўрсатгичи, яъни киши бошига Ялпи Ички Маҳсулот ҳажми бўйича Ўзбекистон 2012 йилдаёқ Қозоғистондан 7 баравар орқада эканлиги эътироф қилинган. Маълумки, кейинчалик бу фарқ 8 га яқинлашиб бўлган эди. Яна маълумки, ўртача ойлик ёки даромад айнан шу кўрсатгичга пропорционал бўлади.