24 January 2015
22:04 - Нью-Йорк фондлар бозорида ўсиш бор, аммо барқарорлик йўқдек кўринади, Ўзбекистоннинг эса келажаги йўқ
Жорийдаги ҳафтада душанбаси АҚШда байром эди – Мартин Лютер Кинг куни. Нью-Йорк фондлар бозори байрамларда ишламайди. Қолган тўрт куннинг натижаси шундай: Фондлар бозорининг асосий кўрсатгичи - Dow Jones индекси кеча, яъни ҳафтаниннг охирги иш кунини 17672 билан тамомлади. Аввалги ҳафта 17511 билан тугалланган эди. Демак, ҳафталик ўсиш 161. Пайшанба куни 300 атрофида ўсиш, жума куни эса 141 лик тушиш бўлгани инобатга олинса, Нью-Йорк фондлар бозорида ҳали ҳам барқарорлик йўқдек кўринади.

Экспертлар бундай барқарорсизликни ҳали ҳам дунё иқтисодининг ўсиш тезлигида тушиш бўлаётгани билан изоҳлашга ҳаракат қилмоқдалар. “Ҳаракат” бу фикрга қўшилмайди. АҚШ иқтисодида ўсиш, Нью-Йорк фондлар бозорида барқарорлик бор. Аммо, ҳозирги барқарорликда, молиявий-иқтисоди кризисдан аввалгисидан фарқли ўлароқ, Dow Jones индексининг зиг-загли чиқиб-тушишлар тасмаси кенгроқдир.

Шундай экан, бугунги босқичда жаҳон иқтисодининг АҚШга салбий таъсири эмас, АҚШнинг жаҳон иқтисодига бўладиган ижобий таъсирини, глобаллашув жараёнларини муҳокама қилиш керак.

Айнан шу тенденцияларни ҳисобга олиб, ўзбеклар глобаллашув жараёнларига мослашишлари, Dow Jones каби қўл билан ушлаб, кўз билан кўриб бўлмайдиган индекслар билан яшашга ўрганишлари керак. Ўзбекистоннинг ҳозирги раҳбарлари бундай нарсларни мутлақо тушунмайдилар ҳам. Ҳалигача Тошкент фондлар бозорида қимматли қоғозлар сотиш йўлга қўйилмаган.

Қолаверса, давлатнинг ҳамма кўзга кўринган компаниялари давлатнинг қўлида, акция деган нарса феълан бизда йўқ ҳисоб. Тошкент фондлар бозори асосан валюта сотиш билан шуғулланади, у ерда Dow Jones каби индекснинг ўзи ҳам киритилмаган. Бу каби масалалар билан мамлакатимиз Бош вазирининг биринчи ўринбосари Рустам Азим шуғулланиши керак. Шуғулланмаётгани - миллат ва ватанга қарши жиноятдир.

Яъни, бир оғиз сўз билан айтсак, Ўзбекистонда ҳали ҳам бозор иқтисодиётининг ўзи йўқ, демак, Ўзбекистоннинг келажаги йўқ. Ўзбек халқи эса, бундай нарсларни билмайди ҳам, қизиқмайди ҳам. Ишимиз оғир. Инқилобий ўзгаришлар бўлмаса, ўзбеклар қозоқларнинг мардикорлари бўлишга маҳкумлар.
« Олдинги хабар Хабарлар рўйхати Кейинги хабар »