17 December 2014
08:28 - Бу дунё шунақа ўзи: Рухсатсиз қурилган уйини қутқариш учун она ўз боласининг бўғизига пичоқ тиради
Туркиянинг Балиқшеҳир вилоятининг Караси туманида рухсатсиз қурилган 20 уйни бузиш учун келган 300 нафар полиция ходими кутилмаган қаршиликка дуч келди, дейилади “Миллиёт” газетасининг хабарида. Хотинлар қўлларига тош, эркакалар болталар олиб, ҳеч кимни уйларига яқинлаштирмаслик учун ҳаракат қилганлар.

Аммо, ҳаммадан кучли қуролни 4 боланинг онаси Жонгул Ойберди ишлатибди. У ўз ўйининг деразасида болаларининг бирини бўғизига пичоқ тираб, полицияга бақирибди: “Кетинглар бу ердан, бўлмаса, ўғлимнинг бўғозини кесаман!”.

Бу ерга мухолифатдаги Жумҳурият Халқ Партиясининг туман ташкилоти раҳбари ва бир неча партия фаолари ҳам келиб, қиш совуқлари бошланаётган пайтда одамларни уйсиз қолдириш хато эканлигини урғулаб, полицияга таъсир кўрсатишга ҳаракат қилишибди.

Хуллас, полиция чекинишга мажур бўлган.

Аммо, “офарин” дейишга одамнинг тили бормайди. Бечора она 4 боласи билан қиш совуғида қолмаслик учун жон аччиғида болакайининг бўғизига пичоқ қадагандир. У бунга мажбур бўлгандир. Шундай бўлса ҳам, ўз боласининг бўғизига пичоқ қадаган онани барибир тушуниш қийин.

Энг осон жавоб: Бу дунё ўзи шунақа, дейишми?

Эслатиб ўтиш керакки, Туркиянинг жуда кўп шаҳарларида, ҳатто Истанбул ва Анқарда қишлоқлардан келган камбағал одамлар ташландиқ ёки ҳали ишлатилмаётган ерларга рухсатсиз уй қуриб оладилар. Кўпинча, бир кечанинг ичида, уй бўлмаса ҳам, бостирма каби бир нарса қуриб оладилар ва оилалари билан кириб оладилар. Бундай уйларни “кеча қўнди”, яъни кечаси қўндирилган уй дейишади. Уларни бузиш учун маҳаллий ҳукумат суд органларидан қарор чиқариб олиши керак. Бу анча вақт олади. Бу вақт ичида кечақўндичилар уйларини анча тартибга солиб олишади.
« Олдинги хабар Хабарлар рўйхати Кейинги хабар »