Яқинда Туркия Президенти Ражаб Эрдўғон Америка қитаъсини мусулмонлар очгани, Кристофер Колумб Кубадаги тоғларнинг бирида мачит кўргани ҳақида гапирганига таҳлил берар экан, “Ҳаракат” Агентлиги ўз хабарида шундай деган эди: “Ражаб Эрдўғон гапларини жиддий манбаларга асосланиб айтган бўлса керак. Акс ҳолда, у нафақат Абдураҳим Пўлат, балки, бутун дунёнинг кулгиси остида қолиши муқаррар. Бундай кулги эса, Ислом дунёсинининг обрўсини оширишга хизмат қилмаслиги аниқ.”

Шу ерда бироз янглишибмиз, на Абдураҳм Пўлат на жаҳоннинг бошқа жиддий сиёсатчилари ва олимлари Эрдўғоннинг устидан кулмадилар. Чунки, Эрдўғон шундай шарманда бўлдики, унинг устидан кулишнинг ўзи кулаётган одамнининг ножиддийлигини кўрсатган бўларди.

Аммо, аслида, Эрдўғон ҳақиқий “мусулмон”лигини кўрсатмоқда, натижада, унинг устидан кулишга сабаб бўладиган воқеалар кун сайин кўпайиб бормоқда.

Кеча Ражаб Эрдўғон Туркиядаги Хотин ва Демократия Жамиятининг йиғилишида иштирок этиб, аёлларнинг эркаклар билан тенглиги, уларнинг ҳақ-ҳуқуқлари ҳақида ҳаммани оғзини очиб қўядиган гаплар гапирди.

Унинг гапларини ҳаммасини қуйидаги бир жумла билан ифодалаш мумкин: “Хотин ва эркакнинг тенглиги фитратга тўғри келмайди”.

Билмаганлар учун айтиш керакки, фитрат сўзи ислом динида кўп ишлатилади ва жуда қисақа қилиб айтганда “яратилиш, табиат, пайғамбарларнинг суннати” каби тушунчаларни ўз ичига олади.

Эрдўғон ўз нутқида эркак билан хотиннинг оёқлари орасида табиатан турли нарслар борлигини тўғридан-тўғри айтмаса ҳам, уларга ишора қилиб, хотин ва эркак табиатан тенг бўлолмаслигини гапирган. Унга кўра, эркак бола туғолмас эканми, қанақа тенглик ҳақида гапириш мумкин. Куласизми, йиғлайсизми?

Маълумки, демократлар эркак ва хотинларнинг тенглиги, Ислом динида эса хотинлар иккинчи даражали одам ҳолига туширилгани ҳақида гапиришади. Туркия Президентидек бир инсон демократлар эркак ва хотиннинг табиатан турли ёки турли эмаслигини назарда тутишмаганини, уларниннг мақсади жамиятда хотинларнинг ролини эркакларникига тенглаштириш эканлигини тушунмаслиги мумкин эмас. Аслида, Эрдўғон турли сўз ўйинлари билан Ислом динида хотинлар иккинчи даражага туширилганини оқлашга интилган.

“Ҳаракат” ўқувчилари учун бу нарса янгилик бўлмаслиги керак. Айнан “Ҳаракат” Агентлиги дунёда биринчи бўлиб, Эрдўғон раҳбарлигидаги Адолат ва Тараққиёт Партиясининг асл мақсади Буюк Отатурк яратган бугунги Туркияни Эрон каби ўрта асрларни эслатувчи ислом давлатига айлантириш эканлигини айтиб келмоқда.

Ҳозир Туркияда ҳижоб расмийлаштирилди, ўғил ва қиз болалар бошқа-бошқа ётоқхоналари ётиши кераклиги масаласи кун тартибига чиқарилмоқда. Қадамма-қадам ўғил ва қиз болаларни алоҳида мактабларда ўқитиш, эр-хотин кўчага чиққанда хотин икки қадам орқада юриши кераклиги ҳам қонунлаштирилади. Табиий, Ислом динига асосланиб қонунлаштирилади. Кейинчалик хотинлар сочи узун, ақли калталиги эълон қилинади. Улар фақатгина эрининг тагида ётиши ва бола туғиши керак, тамом-вассалом.

Ислом динининг чаласавод муллалари Қуръонни авваллари ҳам айнан ҳозир Эрдўғон айтгандек тушунишарди. Эрдўғон ҳам уларнинг ҳолига тушмоқдами? Балки, тушмаётгандир, маскасини очаётгандир, холос. Ислом дини ислоҳотларга муҳтож эканлигини унга ким тушунтиради?

Туркияни бу ҳолга тушишининг олдини оладиган бирдан бир йўл - дунёвийлик тарафдорлари бу партияни демократик усуллар билан сиёсатдан узоқлаштиришидир. Туркия бу аҳволда экан, Турк Дунёси бирлиги мавзусини ҳам четга суриб туриш керак бўлади.