31 October 2014
21:16 - Ҳақиқий хабар “Ҳаракат”да ўқилар: Буни Вашингтон Пост газетаси ҳам тасдиқламоқда
“Ҳаракат”нинг хабарларини мунтазам ўқиб борадиганлар билишади, Туркияда исломий илдизли Адолат ва Тараққиёт Партияси (АТП) ҳокимиятга келгандан кейин, ҳижоб масаласи кун тартибига олиб чиқилди, айни замонда, дунёвий қарашли зиёлилар, сиёсатчилар ва ҳарбийларга қарши “Эргенекон” ва “Балёз” номли операциялар бошланди. Бу операциялар доираси кўп одамларни ҳибсга олинди, уларнинг бир қисми умр бўйи, бошқалари кўп йилларга қамоққа ташланди. Умр бўйи қаммоққа ташланганлар орасида Туркия ҳарбий кучлари Бош штабининг собиқ бошлиғи Илкер Бошбуғ ҳам бор эди.

Тўғри, ўтган йилнинг охирида исломчилар ичида тўпалон чиқиб, АТП ва Фатхулла Гулен тарафдорлари ўртасида феълан уруш бошлангандан кейин, “Эргенекон” ва “Балёз” операциясида қамоққа ташланганларнинг кўпчилиги, жумладан, Илкер Бошбуғ ҳам озод қилинди. Аммо, бу мажбурий қадам бўлганди, биринчи имконият бўлиши билан дунёвийлик таарфдорларини йўқ қилиш сиёсати яна давом этади. Табиий, унгача АТПнинг ўзи ҳокимиятдан четлаштирилмаса.


Ҳижоб масаласи кун тартибига олиб чиқилиб, “Эргенекон” ва “Балёз” операциялари бошланган пайтда “Ҳаракат” агентлиги Туркия исломий давлатга айланиш йўлига тушгани, келажакда Эрон каби ҳолга келиб, Ғарб давлатларининг душманига айланиши муқарралигини ёзган эди. Дунёда ҳеч кимнинг ақлига бундай фикрлар келмагани ҳам ҳақиқат.

Мана узоқ вақт ҳам ўтмасдан, “Ҳаракат”нинг фикрини тасдиқловчилар ўртага чиқмоқда. Масалан, кеча АҚШнинг машҳур Вашингтон Пост газетаси “Сурия бўйича кешимовчиликларда АҚШ ва Туркиянинг 60 йиллик иттифоқи бузилиш аломатлари кўринмоқда” номли мақола эълон қилди.

У шундай бошланади: “Туркия ва АҚШ ўртасидаги Сурия масаласидаги қарашлар фарқлигининг душманларча руҳга ўтиши 60 йиллик иттифоқчиликнинг мустаҳкамлигини текшириш учун тест бўлмоқда, баъзилар бу икки мамлакат ҳали ҳам иттифоқчи эканлигига шубҳа қилишни бошладилар”.

Газета мухбири Туркия-АҚШ алоқаларининг ҳар томонлама анализ қилишга ҳаракат қилган. Масалан, у Туркия НАТОга СССРдан қўрққани учунгина кирганини ҳам, курдлардан ИШИДга қарши фойдаланиш масаласида Туркиянинг ўз манфаатлари борлигини ҳам, яна бир қатор хусусий масалаларга яқинлашишда фарқлар борлигини ҳам тан олади.

Аммо, Эрдўғон ҳокимиятга келгандан кейин Туркия бутунлай ўзгараётганини, авторитаризм янада юксалиб, сиёсатда исломий йўналиш (бренд) олдинга чиққани ва дунёвийлик ҳамда плюрализмдан узоқлашиш бошланганини алоҳида урғулайди.

Айнан шу фикрни “Ҳаракат” йиллардан бери гапириб келмоқда. АҚШда ҳам шуни тушунишга бошлашгани мақтовга сазовор.
« Олдинги хабар Хабарлар рўйхати Кейинги хабар »