20 September 2014
01:43 - Нью-Йорк фондлар бозори қутурмоқда, АҚШ иқтисодида сакраш бўладими?
Охирги иш куни кеча тамом бўлган жорийдаги ҳафтада Нью-Йорк фондлар бозорида юксак ўсиш бўлди. Бозорнинг асосий кўрсатгичи бўлмиш Dow Jones индекси тахминан 300 поғанага юксалди. Пайшанба ва жума кунлари икки марта тарихий рекорд ўрнатилди. Жума кунги рекорд 17 минг 350 га тенг бўлди.

Кейин Хитойнинг Alibaba ширкати акцияларининг нархи кескин ортиши АҚШ ширкатларини бироз урди шекилли, Dow Jones тарихий рекорддан бироз тушиб, жума кунини 17 минг 280 билан тамомлади.

Эслатамиз, Dow Jones индекси АҚШдаги энг катта 30 компания акцияларининг ўртача қийматини ўзида акс эттиради. Демак, катта компанияларнинг иши зўр кетмоқда. Катта компаниялар иқтисоднинг моторидир, демак, АҚШ иқтисоди ҳам кескин юксалиш йўлида.

Россия санкциялар остида бироз оқсаб қолиши муқаррар. Хитой эса, аҳолисининг сони катталиги учунгина кучли иқтисодга эгадек кўринади. Аммо, Хитой киши бошига Ялпи Ички Маҳсулот ҳажми бўйича Ўзбекистондан 4 бараварча олдинда бўлса ҳам, Ғарб давлатларини қўйиб туринг, ҳатто Қозоғистондан 2 баравар орқада. Демак,у АҚШ билан беллошолмайди.

Шундай экан, яқин келажакда маълум бир муддат АҚШ жаҳонда якка ҳоким бўлишини кутиш кераклигини урғулаб, авваллари ҳам кўп марта такрорлаган фикримизни яна қайтарамиз.

АҚШда ишлаётган ўзбеклар фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.

Ўзбекистондаги ота-оналарга ёрдам бериш шарт, аммо у ерга ортиқча пул юбориш ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар АҚШда ҳам ош ейиш ва Ўзбекистонга пул юборишдан ташқари, бу ерда пул йиғиб, кичкина бўлса ҳам ўз бизнесларини очиш устида ўйласалар фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин. Акс ҳолда, Американи ҳам мардикорлар билан тўлатиб юраверамиз.
« Олдинги хабар Хабарлар рўйхати Кейинги хабар »