Тошкент шаҳрининг 1968 йилда Ленин ва Куйбишев туманларини ихчамлаштириш натижасида тузилган Ҳамза тумани бугундан эътиборан Яшнобод тумани деб юритилади. Ўзбекистон Республикаси Олий Мажлиси Сенатининг бугунги ялпи мажлисида қарор берилган бу ном советча топономик атамалардан қочиш мақсадида амалга оширилган. Аммо тарихий номларни тиклашни иддао қилаётган депутат ва сенаторлар Яшнободнинг этимологик маъносига изоҳ беришмаган.

Ҳамза туманига ном беришда аҳоли орасидан бир қанча таклифлар бўлган. Хусусан, уни Толариқ ёки Қўқон йўли деб аташ ҳам мумкин эди. Аммо Яшнободнинг нега танлангани тушунарсиз, дейди мухбиримиз. Совет даврида Лениобод, Комсомолобод сингари ободлар урф эди, афтидан анъана давом этаётганга ўхшайди.

Бу масалага бошқа томондан ёндошсак, унинг яна ҳам муҳимроқ қирраларини кўрган бўлардик, дейди мухбиримиз. Майда-чуйда иш ерлари хусусийлаштирилганини ҳисобга олмасак, Ўзбекистонда Совет тузуми ҳали ҳам яшамоқда. КГБ тарафидан бошимизга ўтқазилган Ислом Карим ўлгунча бошимизда қолмоқчи. Демократия ва инсон ҳуқуқлари каби замонавий тушунчаларнинг ўзи ҳам бизда йўқ. Мамлакат иқтисоди ўлмоқда. Ал Ҳоразмий ва Мирзо Улуғбекнинг авлодлари яқиндагина отдан тушган қозоқларнинг мардикорларига айланишмоқда.

Ҳозир Ҳамзани эмас, тузумни ўзгартишни ўйлаш керак эди. Аммо, минг афсуски, ўзбек халқи, жумладан, унинг зиёлилари, бундай муаммоларни тушунишмайди ҳам. Демак, келажагимиз Ўзбек миллати ва Ўзбекистон давлатининг касаллигига тўғри диагноз қўйган ва уни даволаш йўлларини кўрсатолган ягона мухолифат ташкилоти - “Бирлик” Партиясининг фаоллигига боғлиқ.