16 August 2014
01:23 - Сўнгги икки ҳафта ичида Нью-Йорк фондлар бозорида ўрта-миёна ўсиш бўлди
Икки ҳафта аввал Нью-Йорк фондлар бозорининг асосий кўрсатгичи бўлмиш Dow Jones индекси Украина устида руслар Малайзия учоғининг уриб тушириши ва АҚШда июль ойида кутилгандан камроқ иш ерлари яратилгани таъсирида тахминан 600 поғанага тушиб кетган ва 16493 да тўхтагани ҳақида хабар берган эдик.

Ўтган икки ҳафтада Dow Jones индекси зиг-загли ўсиш кўрсатди ва кеча жорийдаги ҳафтани 16693 да битирди. Яъни, икки ҳафта ичида роппа-роса 200 поғана юксалди. Dow Jones индекси бир ойча аввал урган тарихий рекордидан бироз пастда бўлса ҳам, умуман олганда, АҚШда иқтисодий ўсиш давом этаётганини кўрсатмоқда.

Шу сабабли, авваллари ҳам кўп марта такрорлаган фикримизни яна қайтарамиз.

АҚШда ишлаётган ўзбеклар фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.

Ўзбекистондаги ота-оналарга ёрдам бериш шарт, аммо у ерга ортиқча пул юбориш ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар АҚШда ҳам ош ейиш ва Ўзбекистонга пул юборишдан ташқари, бу ерда пул йиғиб, кичкина бўлса ҳам ўз бизнесларини очиш устида ўйласалар фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин. Акс ҳолда, Американи ҳам мардикорлар билан тўлатиб юраверамиз.
« Олдинги хабар Хабарлар рўйхати Кейинги хабар »