21 April 2014
02:20 - Насронийларнинг пасхаси туфайли Украина жанубида нисбатан тинчлик, аммо руслар Женева Декларациясига риоя қилмоқчимаслар
Табиий, нисбатан тинчлик ҳақидагина гапириш мумкин. Украинанинг жорийдаги ҳукумати пасха туфайли “тинчлик” эълон қилгани ҳам ўз ролини ўйнади.

Бироқ, шанбадан якшанбага ўтар кечаси Донецк вилоятининг Словянск шаҳри атрофидаги Россияга қўшилиш ниятида бўлган маҳаллий руслар тарафидан қурилган блокпостга 4 та автомобилда келган номаълум гуруҳ қуролли ҳужум қилди. Блокпостдагилар ҳам ўқлар билан жавоб бердилар.

Украина Ички ишлар вазирлигининг маълумотига кўра, блокпостдаги руслардан 3 киши ҳалок бўлди. Русларнинг хабарига кўра, 7 киши ҳалок бўлган, ҳужум қилганлар 2 та автомобилларини ташлаб ва ҳалок бўлган одамларини олиб қочганлар. Улар ташлаб кетган машинада ҳужумчилар украинларнинг “Ўнг қанот” номли миллатчилар ташкилотидан эканлигини кўсатувчи ҳужжатлар топилган эмиш.

Маълумки, “Ўнг қанот” Украинадаги расмий ҳукуматга киради. Агарда унинг одамлари бу ҳужумни уюштирган бўлса, мавжуд ҳукумат Женева Декларациясини бузаётган бўларди. Аммо, “Ўнг қанот” шундай провакацияга қўл урса, ўзини фош қиладиган ҳужжатларни блокростга ҳужум қилган автомобилларида олиб келганига ишониш қийин эмас, ишониб бўлмайди. Бунинг устига автомобиллар, расмда кўриб турганингиздек, ёниб битган.

Украинлар эса, ҳужумни русларнинг ўзи уюштиргани, улар қурбонлар бериб бўлса ҳам, расмий Киевни Женева Декларациясини бузишда айблашга уринаётганларини гапирмоқдалар.

Шуни ҳам урғулаш керакки, Донецк ва Луганск вилоятларида ҳокимликларнинг биноларини босиб олиб, ҳеч қандай сайловларсиз ўзини халқ ҳокимияти деб эълон қилган россияпараст русларнинг раҳабарлари Женева Декларациясини тан олмасликларини аллақачон эълон қилиб бўлганлар.

Демак, Женева Декларациясидан кейин ҳам Украина жанубида тинчлик бўлмайди. Ҳамма нарса Россия Президенти Владимир Путиннинг ҳаёлида қандай режалар борлигига ва Ғарбнинг Россияга қарши санкцияларни орттириш ҳақидаги огоҳлантиришлари унга қандай таъсир кўрсатаётганига боғлиқ. У ўзини қаҳрамондек ва санкцияларга ҳеч қандай эътибор бермаётгандек қилиб кўрсатишга уринмоқда. Бироқ, бунга ишониш қийин.

Хуллас, вазият оғир ва яқин келажаги ноаниқсиз бўлиб қолаверади. Аммо, қачонгача? Бу саволга жавоб ҳозирча йўқ.
« Олдинги хабар Хабарлар рўйхати Кейинги хабар »