Ўзбекларни алдаш учунгина ўзини нодавлат ахборот агентлиги деб таништирадиган, аслида мавжуд режимнинг қўғирчоқларидан бири бўлган Turkiston-Press тарафидан фақат рус тилида 18 апрель куни тарқатилган хабар - шу йил 16-17 апрель кунлари Ўзбекистонда бўлган Буюкбритания Ташқи ишлар ва Ҳамдўстлик масалалари бўйича катта давлат вазири Саида Варси билан ўтказилган суҳбат матнидан иборат.

Turkiston-Press изоҳ бермаган бўлса ҳам айтиш керакки, Саида Варси бизнинг стандартлар бўича Буюк Британия Ташқи ишлар вазирлигидаги “Ташқи ишлар ва Ҳамдўстлик масалалари” деса бўладиган Бошқарманинг раҳбаридир. Бир қатор Ғарб давлатларида ҳали ҳам эркакларга “барон”, аёлларга (русча айтсак) “баронесса” деб бериладиган унвон соҳиби бўлган Саида Варси Turkiston- Рress мухбирининг ўта умумий шаклда берган саволларга ўта умумий шаклда жавоб бериш билан чекланибди. Бу суҳбат билан танишган одам ҳеч қандай жиддий маълумот ҳам, биронта қизиқарли янги факт ва янги фикр ҳам тополмайди.

Нима эмиш, икки мамлакат ўртасида алоқалар ҳар доимгидан мустаҳкаммиш. Тўғрироғи, баронесса алоҳида урғулагандек, сўнгги 10 йил ичида мустаҳкам бўлганмиш.

Шу гапнинг ўзи кўрсатмоқдаки, дейди “Ҳаракат”нинг эксперти, Буюкбритания билан алоқаларимиз НАТО қўшинлари Афғонистонга антитеррор операцияси доирасида киритилгани учунгина пичоққа илинадиган даражага чиққан. Ҳозир НАТО аъзоси бўлган Буюкбртания ўз қўшинларини Афғонистондан олиб кетиш арафасида экан, Ўзбекистонга эътибор яна кучайтирилгани табиий.

“Ҳаракат” Агентлигининг бу бир тийинга қиммат суҳбатга эътибор беришининг сабаби қуйидагича.

Баронесса Саида Варсидек дипломат Ўзбекистон жаҳоннинг 10 та энг ёмон диктаторликлари рўйхатида эканлиги билмаслиги мумкин эмас. У шуни билгани учунТошкентда “Бирлик” Партияси раисининг Бош котиби, Инсон ҳуқуқлари “Эзгулик” жамиятининг раҳбари Васила Иноят билан яккама-якка учрашди ва Ўзбекистонда демократия ва инсон ҳуқуқларининг аҳволи бўйича янги маълумотлар олди. Инсон ҳуқуқлари ёппасига поймол қилинаётгани, ҳалигача болалар меҳнатидан фойдаланиш кенг кўламда давом этаётганини ўрганди. Бу масалалар бўйича ўзгаришга эришиш учун авваламбор сиёсий мухолифат тан олиниши, ҳукумат тарафидан рўйхатга олиниши кераклиги ҳақидаги мутлақо тўғри фикр билан танишди. Ўзбекистонда фаолият кўрсатаётган “Бирлик” Партиясини мавжуд режим 20 йилдан бери рўйхатдан ўтказмай келаётганини, 2003 йилда бу партия қайтадан шаклланиб, 21 мингдан ортиқ аъзоларининг рўйхатини Адлия вазирлигига топширган бўлса ҳам, вазирлик ҳалигача ҳеч бир қадам қилмаганини билиб олди.

Хўш нима учун бу баронесса, аниқроғи, замонавий демократиянинг рамзларидан бири бўлган Буюкбританиянинг вакили Turkiston- Рress мухбири билан бўлган суҳбатда бу муҳим мавзуларни мутлақо тилга олмади, энг юмшоқ шаклда бўлса ҳам айтиб ўтмади.

Turkiston- Рress мухбири Ўзбекистонда икки кун қолган англиялик дипломат Бош вазирнинг биринчи ўрибосари, Молия вазири Рустам Азимов, Ташқи ишлар вазири Абдулазиз Комилов, Мудофаа вазири генерал-лейтенант Қобул Бердиев, Ташқи иқтисодий алоқалар, инвестиция ва савдо вазири Элёр Ғаниев, Олий Мажлиснинг ташқи сиёсий алоқалар комитети раиси сенатор Содиқ Сафаев, ҳамда Инсон ҳуқуқлари Миллий марказининг директори Акмал Саидов билан учрашганини урғулар экан, меҳмон бу суҳбатда ўша учрашувлар бўйича ўз таасуротларини гапирганини айтади.

Turkiston- Рress эълон қилган суҳбат матнидан келиб чиқсак, Саида Варсининг жавоблари очиқча кўрсатиб турибдики, у Ўзбекистонда демократия ва инсон ҳуқуқлари масаласи аянчли аҳволда эканлигини билса ҳам, ўзини билмасликка солмоқда. Буюкбританиядек давлат жаҳоннинг 10 та энг ёмон диктаторликларидан бири бўлган Ўзбекистон билан ҳеч нарса бўлмагандек алоқаларни давом эттиришга тайёр эканлигини гапирмоқда.

Демак, очиқча айтсак, у Ўзбекистонга ташрифи бўйича ёлғон гаплар гапириб, Ўзбекистон режимнинг кирдикорларини бекитишга, ўзбекларни алдаш ҳаракатига тушиб, диктаторлик режимига хизмат қилмоқда.

Балки, баронесса Саида Варси Ўзбекистон расмийлари билан учрашганда бу мавзуларни тилга олгандир, уларни бу суҳбат ичида ҳам гапиргандир, аммо, Turkiston- Рress эса уларни олиб ташлагандир. Шундай бўлса, ёлғончи Саида Варси эмас, Turkiston- Рress бўларди.

Биз бу ҳақда Саида Варсидан изоҳ талаб қиламиз. Буюкбритания давлатининг агентлиги бўлмиш ББС, биринчи навбатда, унинг ўзбекча хизмати ҳам бу мазуга очиқлик киритиши ва ўз баронессаларининг лойга бўялган обрўсини ювишга ҳаракат қилиши керак.

Дарвоқе, Ўзбекистондан қочволиб, Европада ҳуқуқ ҳимоячилиги билан шуғулланаётганни иддао қилувчи ўзбеклар бор. Қани, улар ҳам бу баронесса билан шуғуллансинлар.